عجبى عليك يا وطن

عجبى عليك يا وطن فيك الزمان مقلوب
فيك الضمير اتعجن والدم بئى خروب
ساقع ومالوش طعم بجد حاجة تغم
والناس اهى عايشة وحياتها وهم ف وهم
ييجى الكبير فيهم يصرخ باعلى الصوت
قطر الحياة بيفوت
عايز يصحى ضمير محكوم عليه بالموت
ومين يصحى ف مين
وكل القلوب نايمين
مدفونة جوه الصخر
وادى السنين بتمر
واحنا ولا حاسين
كل اللى كان اهو راح
والباقى بس جراح
ودموع مابين افراح
والحال ولا يوم هايسر
اخوة على ولاد عم
عايشين ف كرب وغم
والناس بتتفرج
كلو بئى يهرج
والاسم متضامنين
اصل التجارة شطارة
واصل الندالة عبارة
بتقول: ( نشجب وندين )
اشجب وماتغنيش
على ايه بتتباهى
مليون شهيد وشهيد
غابو ف متاهة
جدرانها حبة صور
وكلام يغم القلب
واهو كلو كدب ف كدب
طب مين بيغنى لمين
ومين ف يوم يسمع
وف كل يوم ملايين
العيون تدمع
كل الكلام معسول
لكن مفيش مفعول
ومنين نجيب محلول
يحيي القلوب تانى
اصل الكلام ببلاش
والصعب اصبح سهل
كلو بئى ابو جهل
حاطط ايديه فى المية
واللى يموت مايموت
والحى طبعا ابئى
اصل الحياة دى مسابقة
والجايزة ذنبة كبيرة
واللى ياخدها يفوق
م النوم يلاقى حصيرة